• Tweet
• Sharebar

• Tweet

من فترة أطلقت على تيتة جدة ماما ( اللي هي مامة جدتي في نفس الوقت ) لقب فاتن حمامة .. دا كان بعد مرة اتصلت على التليفون عشان تسأل على حاجة معينة وأنا رديت عليها وفوجئت بحد بيقولي مساء الخير ولو سمحتي قبل كل سؤال وينهى المكالمة بشكراً  !! .. لو فكرت هتلاقي الأسلوب دا اختفى من حياتنا تماماً .. مافيش مساء الخير .. مافيش شكراً لما حد يساعدك.. مافيش لو سمحت أو من فضلك لما يكون عندك طلب .. وبالتالي مافيش العفو وهكذا

المشكلة إن الناس شايفة الحاجات دي شكليات وجودها زي عدمه وللمجاملة مش أكتر رغم إنها فعلاً من أساسيات الحوار والتعامل مع الناس .. وإن الرجل الغريب في الشارع لو ساعدك عشان تركن عربيتك مثلاً أو الشاب اللي بيقوم من مكانة في مواصلات عشان حضرتك تقعد يستاهل تقوله شكراً  مش بس تبتسم وتسكت، كمان وقع طلب بتطلبه من شخص ما لما يكون قبله من فضلك أو لو سمحت مختلف تماماً

اللي حضرتك ممكن تكون بتفكر فيه كمواطن بتنزل الشارع مش عارف تسوق عربيتك ،مش لاقي مواصلات مش لاقي مكان تركن بتتعذب من أول ما تخرج من البيت لحد ما  ترجع إنه يعني معلش شكراً إيه و ميرسي إيه اللي هقولها للناس ، الناس بقت همجية أصلاً ومش بيقدروا الكلام دا ، عشان كدا الفترة اللي فاتت كل ما اكون في تاكسي كنت باقصد أقوله شكراً لما أوصل والنتيجة إنه أسوأ الظروف بيقول العفو حتى اللي شكله عصبي منهم ومشغل أبو الليف في التاكسي يعني الناس كويسة أهوه ، إبدأ حضرتك بس

البداية إنك تبدأ/ي بالمحيطين بك ، اشكر/ي والدتك لما تعملك حاجة كويسة ، اشكر مراتك علشان عملت غداء انهارده ( طبعاً هي بتعمل أكل كل يوم فانت هتشكرها كل يوم أيوة ) اشكر/ي اخوك او اختك لما يجيبلك ريموت التلفزيون مثلاً

أو مثلاً قول/ي للبواب لو سمحت لما تطلب منه حاجة المهم انك تعود نفسك على الأسلوب دا إلى أن يكون أساسي في حياتك ..

خليك فاتن حمامة